बीरगंज २१ फागुन। त्रिभुवन अन्तर्राष्ट्रिय विमानस्थलको वाकथ्रु गेट पार गरिसकेका ४ जना उज्वेकिस्तानका नागरिक फागुन १४ मा साँझ पक्राउ परेका थिए ।
पक्राउ गरेको करिब ३ घण्टाको प्रयास पछि आरोपीहरूले मलद्वारमा लुकाएर ल्याएको सुन प्रहरी अधिकृतहरूले बरामद गरेकाे थियाे ।
३ जना महिलाको शरीरबाट ३ केजी ७४५ ग्राम सुन बरामद गरिएको विमानस्थल सुरक्षा कार्यालयका एसएसपी सोमेन्द्र राठौरले जनाए ।
४१ वर्षीय तुरसुनोभ सारदोर चाहिँ सुनको मालिक भएको अनुसन्धान अधिकृतहरूको आशङ्का छ । सारदोरको साथमा भने सुन भेटिएन ।
सुन ल्याउनेमा उज्वेकिस्तानको तास्केन्त सिटीमा बस्दै आएका ४९ वर्षीया फेजिभा साउदत, ४८ वर्षीया अख्मेदोभा उमिदा र ५४ वर्षीया मारिफालिभा दिलफुला छन् ।
तीनैजना फ्लाई दुबईको एउटै उडानमार्फत नेपाल आएका हुन् । प्रहरीले उनीहरूमाथि थप अनुसन्धान र कानुनी कारबाही गर्न भनेर त्रिभुवन विमानस्थल भन्सार कार्यालयमा बुझाएको छ ।
विमानस्थल भन्सार कार्यालयका उपसचिव अर्जुन न्यौपाने नेतृत्वको टिमले त्यसबारे अनुसन्धान गरिरहेको छ । भने विमानस्थल भन्सार कार्यालयका उपसचिव शान्तिराम निरौला भन्छन्, ‘अनुसन्धान अधिकृत तोकेर अनुसन्धान गरिरहेका छौँ ।’
तास्केन्तबाट दुबई हुँदै नेपाल आएका उनीहरू सामान्य महिला हुन् । उमिदा र दिलफुला एउटै परिवार भित्रका दिदी बहिनी हुन् । अर्की आरोपी साउदत्तले लुकाएर ल्याएको १ केजी ३३ ग्राम सुनको मालिक पुरुष व्यक्ति सारदोर भएको प्रहरी अधिकृतहरूको आशङ्का छ । विमानस्थल सुरक्षा कार्यालयले विमानस्थल भन्सार कार्यालयलाई बुझाएको प्रहरी प्रतिवेदनमा पनि सो कुरा उल्लेख छ । तर, सारदोरले चाहिँ त्यसबारे अस्वीकार गरेका छन् ।
आफूले मलद्वारमा लुकाएर ल्याएको सुन दुबईबाट कसले पठाएको र सँगै आएका पुरुषको ‘कनेक्सन’बारे साउदत्तले केही बताएकी छैनन् ।
उमिदा र दिलफुजाले अनुसन्धान अधिकृतहरूसँग भनेका छन्, ‘पुरुष व्यक्ति सारदोरसँग हाम्रो सम्बन्ध छैन, फ्लाइटमा संयोगले सँगै परेका हौँ ।’ प्रहरीले उमिदाको साथबाट १ केजी २०५ ग्राम र दिलफुजाको साथबाट १ किलो २१ ग्राम सुन बरामद गरेको छ ।
मलद्वारमा लुकाएर लिएर आएका तीनैजना महिला सामान्य परिवारका हुन् । सुन ल्याउने साउदत्त शारीरिक रूपमा अशक्त छिन् ।
दुबईबाट काठमाडौँसम्म सुन बोकेर अाएबापत उनीहरूलाई ५ सय डलर दिने आश्वासन तस्करले दिएको अनुसन्धानबाट थाहा भएको छ । पाँच सय डलरको नेपाली रुपैयाँ करिब ७० हजार हुन्छ ।
त्रिभुवन विमानस्थल भन्सार कार्यालयका एक जना अधिकृत भन्छन्, ‘काठमाडौँसम्म सुन ल्याएबापत एक जनालाई ५ सय डलर दिन्छु भनेर तस्करले भनेका रहेछन् ।’
नेपालमा पुगेपछि होटलमा पैसा नलाग्ने र चन्द्रागिरिमा घुमाइदिने सर्तमा उनीहरू दुबईबाट मलद्वारमा सुन लुकाएर नेपाल आएको भेटिएको छ ।
अनुसन्धान अधिकृत भन्छन्, ‘चन्द्रागिरि घुमाउने र होटल खर्च नलाग्ने भनेर तस्करले आरोपीहरूलाई सुनको भरियाको रूपमा प्रयोग गरेको देखिन्छ ।’
दुबई विमानस्थलमा वाकथ्रु गेट पार गरिसकेपछिको शौचालयमा गएर उनीहरूले मलद्वारमा सुन लुकाएका हुन् । भन्सार कार्यालयका एक जना अधिकृत भन्छन्, ‘तस्करले वाकथ्रु गेट पार गरिसकेपछि शौचालयमा लगेर सुन लुकाउन लगाउने रहेछन् ।’
तस्करले उनीहरूलाई ‘कोड भाषा’ दिएर पठाउँछन् । काठमाडौँ विमानस्थलमा आएपछि पार्किङमा ‘कोड भाषा’ भन्नेसँग जान र सुन दिन उनीहरूलाई भनिएको हुन्छ ।
आरोपीहरू यसअघि पनि पटक–पटक नेपाल आएको भेटिएको छ । साउदत्त चौथोपटक काठमाडौँ आएकी हुन् । उमिदा तेस्रो पटक काठमाडौँ आएकी हुन् । दिलफुजा भने यसपटक मात्रै काठमाडौँ आएको ट्राभल हिस्ट्री भेटिएको छ ।
यसअघि पनि पटक–पटक नेपाल आएका ४१ वर्षीय तुरसुनोभ सारदोरले चाहिँ आफू व्यापारको लागी नेपाल आउने गरेको जनाएका छन् । अनुसन्धान अधिकृतहरूसँग उनले भनेका छन्, ‘मेरो व्यापार छ ।’
सारदोर अहिलेसम्म कत्ति पटक नेपाल आएर फर्किए भन्ने विवरण विमानस्थल अध्यागमन कार्यालयसँग माग गरिएको अनुसन्धान अधिकृतहरूले बताए ।
प्रतिक्रिया