प्रहरीका अनुसार जनकपुरबाट काठमाडौँतर्फ जाँदै गरेको ना ५ ख ८५३७ नम्बरको बस बिहान करिब १० बजे हेटौँडा – पथलैया सडकखण्डको उकालोमा पुग्दा अचानक ब्रेक फेल भएर ब्याक हुँदा पछाडिबाट आउँदै गरेका दुई वटा मोटर साइकल च्यापिएकाे थियाे ।
जिल्ला प्रहरी कार्यालय बाराका प्रवक्ता डीएसपी विजयराज पण्डतिका अनुसार बारा फेटा गाउँपालिका वडा नं. १ भरवलियाका २५ वर्षीय मकेश्वर पटेल र पर्सा वीरगंज महानगरपालिका वडा नं. ३१ बस्ने २६ वर्षीया कविता देवीको मृत्यु भएको छ ।
उपचारका लागि उनीहरूलाई कलैया प्रादेशिक अस्पतालतर्फ लैजाने क्रममा बाटोमै मृत्यु भएको अस्पतालले जनाएको छ ।
दुवैलाई अस्पताल पुर्याउँदा दिउँसो १२ ः १० बजे चिकित्सकले मृत घोषित गरेका थिए ।
अन्य घाइते हुनेहरूमा मकेश्वर पटेलकी पत्नी २२ वर्षीया कबिता देवी, २० महिनाकी छोरी तानेया पटेल, अर्को मोटर साइकलका चालक २७ वर्षीय कञ्चन कुमार पटेल र उनका ३ वर्षीय छोरा आयुष पटेल रहेका छन् । मकवानपुरस्थित सहकारी अस्पतालमा उनीहरूको उपचार भइरहेको प्रहरीले जनाएको छ ।
बस चालक सर्लाही लालबन्दी नगरपालकिा वडा नं. ३ का ४७ वर्षीय विश्वनाथ चौधरीलाई इलाका प्रहरी कार्यालय अमलेखगञ्जले नियन्त्रणमा लिएको छ । बस र मोटर साइकल दुर्घटनास्थलमै छन् ।
बस पछाडि रहेको म प्र ०३–००१ ज ०६६२ नम्बरको ईभी माइक्रो गाडीको अगाडिकाे भागमा सामान्य क्षतिपुगेको प्रहरीले जनाएको छ ।
दुर्घटनापछि केही समय अवरुद्ध भएको बाटोलाई एकतर्फी सञ्चालनमा ल्याइएको छ ।
प्रतिक्रिया