बीरगंज १ पुस । भारतीय प्रहरीको मोस्ट वाण्टेड सूचीमा रहेका आरिफ खान उर्फ आरिस हुसेनलाई प्रहरीले पक्राउ गरेको समाचार छ ।
मंसिर २९ मा उनलाई घाइते अवस्थामा सिरहा नगरपालिका वडा नं. १७ स्थित माडरबाट पक्राउ गरिएको जिल्ला प्रहरी कार्यालय सिराहाका डीएसपी विरेन्द्र कुमार पासवानले संचारकर्मीलाइ जनाए ।
१७ वटा लुटपाट र हातहतियार मुद्दामा उनी भारतीय प्रहरीको मोस्ट वाण्टेड सूचीमा छन् । बिहारस्थित मधुवनी जिल्लाको प्रहरीले उनलाई पक्राउ गर्नेलाई २५ हजार पुरस्कारकाे घोषणा गरेको छ ।
महोत्तरीमा २०८० जेठ २८ मा भएको एनएमबी बैंक लुटपाटमा उनी संलग्न रहेको रहस्य खुलेको छ । हतियारधारी बैंकमा पसेर पेस्तोल देखाएर ३८ लाख लुटेर भागेका थिए ।
त्यसबेला आरिफ हुसेन सुटरको भूमिकामा बैंकमा प्रवेश गरेको डीएसपी पासवानले जनाए ।
सिराहाको कल्याणपुर नगरपालिका वडा नं. ८ स्थित ग्लोबल आइएमई बैंकको शाखा कार्यालयका लेखापाल उपेन्द्र शाहबाट ९ लाख नगद लुटेको घटनामा पनि उनको संलग्नता देखिएको छ ।
त्यसबारे अनुसन्धान गर्न उनलाई इलाका प्रहरी कार्यालय मिर्चैयामा पठाइएको डीएसपी पासवानले बताए ।
प्रतिक्रिया