बीरगंज ५ पुस। दुई महिना देखि थुनामा रहेका पुर्व गृहमन्त्री रवि लामिछाने विरुद्ध प्रहरीले आज शुक्रबार जिल्ला अदालतमा मुद्दा दायरको तयारी गरेको समाचार छ ।
सूर्यदर्शन सहकारीको रकम दुरुपयोगमा पूरक अभियोगपत्र दायर हुन लागेको हो । प्रहरीले एक अर्ब ५१ करोड बिगो कायम गरी लामिछाने सहित ५१ जना विरुद्ध मुद्दा चलाउन गत सोमबार राय सहितको अनुसन्धान प्रतिवेदन बुझाएको थियो ।
प्रहरी प्रतिवेदनका आधारमा सरकारी वकिल कार्यालयले सहकारी ठगी सहित सम्पत्ति शुद्धीकरण तथा संगठित अपराध मुद्दा चलाउन लागेको हो । सम्पत्ति शुद्धीकरण मुद्दामा अधिकतम ९० दिन थुनामा राखेर अनुसन्धान गर्न मिल्ने कानूनी व्यवस्था छ ।
सो मुद्दाका आरोपी मध्ये एक पूर्व डि.आइ.जी. छविलाल जोशी पक्राउ परेको शुक्रबार ९० दिन पुग्ने भएकाले मुद्दा दायर गर्न लागिएको हो ।
लामिछाने सहकारीमा प्रत्यक्ष संलग्न नभएपनि गोर्खा मिडियामा गएको सहकारीको पैसा खर्च गर्नेमा उनको समेत भूमिका रहेको भन्दै पक्राउ गरेर मुद्दा चलाउन लागिएको हो । रा.स्व.पा.ले भने राजनीतिक प्रतिशोधका आधारमा लामिछाने विरुद्ध मुद्दा चलाउन लागिएको भन्दै विरोध गर्दै आएको छ ।
मुद्दा दायर पछि अदालतमा उनको बयान हुनेछ । बयानपछि साधरण तारेखमा छाड्ने, धरौटीमा छाड्ने वा पुर्पक्षका लागि थुनामा पठाउने आदेश हुनेछ ।
पोखरामा छुटेपनि उनलाई नियन्त्रणमा लिएर रुपन्देही, चितवन, काठमाडौं र पर्सामा लगेर मुद्दा दायर गर्ने प्रहरीकाे तयारी रहेकाे चर्चा सुनिन्छ ।
प्रतिक्रिया