बीरगंज १३ फागुन । पश्चिम नवलपरासी पालिनन्दन गाउँपालिका वडा नं. ३ मा आज भएको झडपमा घाइते भएका एक जनाको मृत्यु भएको समाचार छ ।
झडपका बेला गाडीले किचेर घाइते विजय धवलको उपचारका क्रममा भैरहवा मेडिकल कलेजमा मृत्यु भएको खबर छ ।
उनलाई अस्पतालले सवा ५ बजे मृत घोषणा गरेको सशस्त्र प्रहरीका सहप्रवक्ता शैलेन्द्र थापाले जनाएका छन् ।
आज मंगलबार दिनभर उक्त स्थानमा दुई समूहबीच झडप भयो । स्थानीय युवक र युवतीको प्रेम सम्बन्धको विषयमा दुई समूहबीच केही समय पहिले देखि बढेको विवादले आज उग्ररुप लिएको थियाे ।
झडप नियन्त्रण लिन पुगेको प्रहरीको गाडी नै स्थानीयले जलाइदिएका छन् । यस्तै एउटा गोदाममा समेत आगजनी गरेका छन् । त्यसक्रममा ११ जना नेपाल प्रहरी, ६ जना सशस्त्र प्रहरी र ६ जना स्थानीय घाइते भएका छन् ।
स्थिति नियन्त्रण लिन नेपाल प्रहरी र सशस्त्र प्रहरी बल नेपालले अश्रुग्यास र हवाई फायर गरेको थियो ।
सशस्त्र प्रहरीले एसएलआरबााट १ राउण्ड हवाई फायर र ६ सेल अश्रुग्यास फायर भएको जनायाे । बाँकी नेपाल प्रहरीले हवाई फायर र अश्रुग्यास चलाएका थिए ।
प्रस्तावित सीमा सुरक्षा गुल्म हरपुरबाट डीएसपीको कमान्डमा ६३ जना, नं २६ गण पश्चिम नवलपरासीबाट डीएसपीको कमाण्डमा ४५ जना, नं २७ गण रुपन्देहीबाट इन्सपेक्टरको कमाण्डमा ३५ जना र सीमा सुरक्षा तालिम शिक्षालय बर्दघाटबाट इन्सपेक्टरको कमाण्डमा ३५ गरी १७८ जना सशस्त्र प्रहरी खटिएको सहप्रवक्ता थापाले जनाए ।
प्रतिक्रिया