भारतमा ७८ अर्बको साेयाबिन तेल, पाम आयल, अलैची र अमेरिकामा ५ अर्ब भन्दाबढीकाे कार्पेट निर्यात

बीरगंज ७ जेठ । चालु आर्थिक वर्षको दश महिनाको अवधीमा निर्यात दर ७२.७१ प्रतिशतले बृद्धि भएको छ । भने अघिल्लो आर्थिक वर्षको १० महिनाको तुलनामा चालु आवमा यो परिमाणमा निर्यात दर बढेको खबर छ ।

यो वर्षको दश महिनामा २ खर्ब १७ अर्ब ९१ करोड १० लाख रुपैयाँबराबरको नेपाली वस्तु विभिन्न मुलुकमा निर्यात भएको छ। अघिल्लो वर्षको दश महिनाको अवधीमा भने १ खर्ब २६ अर्ब १७ करोड ३५ लाख रुपैयाँबराबरको निर्यात भएको थियो ।

भन्सार विभागले बुधबार सार्वजनिक गरेको तथ्याँकअनुसार चालु आवको दश महिनामा आयात दर पनि १३.११ प्रतिशतले बृद्धि भएको छ । जसअनुसार १४ खर्ब ७४ अर्ब १८ करोड ८२ लाख रुपैयाँबराबरको विभिन्न वस्तु नेपालमा आयात भएको छ ।

अघिल्लो वर्षको यहि अवधीमा भने १३ खर्ब ३ करोड ३५ लाख रुपैयाँबराबरको आयात भएको थियो । दश महिनाको अवधीमा वैदेशिक व्यापारमा १२ खर्ब ५६ अर्ब २७ करोड ७२ लाख रुपैयाँबराबरको नेपालले घाटा व्यहोरेको छ ।

यो दश महिनाको अवधीमा सबैभन्दा बढी सोयावीन तेल निर्यात भएको छ । ७८ अर्ब ७५ करोड ६६ लाख रुपैयाँबराबरको ३७ करोड ४० लाख ८५ हजार लिटर तेल भारतमा निर्यात भएको छ ।

यस्तै दोश्रोमा सनफ्लावर तेल निर्यात भएको छ । १० अर्ब ९ करोड ४९ लाख रुपैयाँबराबरको ५ करोड ५७ लाख ७९ हजार लिटर भारतमा निर्यात भएको छ । 

यस्तै ठूलो अलैंची ६ अर्ब ६६ करोड २५ लाख रुपैयाँबराबरको ३६ लाख ८० हजार किलो भारतमै निर्यात भएको छ । त्यस्तै १ अर्ब ९३ करोड २६ लाख रुपैयाँबराबरको ३९ लाख ५३ हजार लिटर पाम आयल भारतमा निर्यात भएको छ ।

त्यस्तै ५ अर्ब ३५ करोड ९१ लाख रुपैयाँबराबरको २७ लाख १७ हजार स्क्वायर मिटर विभिन्न प्रकारको कार्पेट अमेरिकामा निर्यात भएको छ ।