बीरगंज २५ श्रावण । सप्तरीका प्रमुख तीन सडक खण्डको ठेक्का सम्झौता रद्द भएको दुई महिनाभन्दा बढी समय बितिसक्दा पनि निर्माण कार्य पुनः सुरु हुन सकेको छैन।
सडक निर्माण कार्य अलपत्र परेपछि स्थानीय बासिन्दा तथा यात्रुहरू जोखिमपूर्ण यात्रा गर्न बाध्य भएका छन्।
राजविराज–छिन्नमस्ता, राजविराज – रूपनी र राजविराज – हनुमाननगर–भारदह सडक खण्ड लामो समयदेखि जीर्ण अवस्थामा रहेका छन्।
दिनहुँ आवतजावत गर्ने सर्वसाधारणले सडकको खराव अवस्थाका कारण आर्थिक, शारीरिक तथा मानसिक सास्ती खेप्नुपरेको छ।
स्थानीय र कर्मचारीको दुःखेसो
हनुमाननगर कंकालिनी नगरपालिका–इनरुवाका स्थानीय विजय देवका अनुसार सडक अत्यन्तै बिग्रिएकाले सवारीसाधन चलाउनसमेत कठिनाइ हुने गरेको छ।
दैनिक कार्यालय तथा बजार आउजाउ गर्दा सवारीसाधन उफ्रिने र दुर्घटनाको जोखिम उच्च रहने गरेको उहाँले बताउनुभयो।
जीर्ण सडकका कारण सबैभन्दा बढी असर गर्भवती, सुत्केरी तथा दीर्घरोगीहरूलाई परेको छ। नाम उल्लेख नगर्ने सर्तमा एक महिला कर्मचारीले बिग्रिएको सडकमा यात्रा गर्दा आफूले दुईपटक प्राकृतिक गर्भपतन (गर्भ तुहिनु) को पीडा भोग्नुपरेको व्यथा सुनाउनुभयो।
विकल्पको अभावमा जोखिम मोलेरै भए पनि दैनिक कार्यालय आउजाउ गर्नुपर्ने बाध्यता रहेको उहाँको भनाइ छ।
डिभिजन कार्यालयको तयारी र पृष्ठभूमि
सडक डिभिजन कार्यालय लहानका प्रमुख ध्रुव झाका अनुसार यी सडकहरू पाँच वर्षअघि नै निर्माण सम्पन्न भइसक्नुपर्ने थियो। तर निर्माण कम्पनीको लापरबाहीका कारण काम रोकिएको उहाँले बताउनुभयो।
ठेक्का रद्दीकरणको कारण: स्तरोन्नति तथा नाला निर्माणको ठेक्का पाएको 'साह इन्जिनियरिङ कन्स्ट्रक्सन प्रालि, शम्भुनाथ' ले समयमा काम नगरेको र ताकेता गर्दा पनि अटेर गरेपछि भौतिक पूर्वाधार मन्त्रालयको निर्देशनमा डिभिजन कार्यालयले गत २०८३ जेठ ७ गते (सार्वजनिक खरिद ऐन, २०६३ बमोजिम) ठेक्का रद्द गरेको थियो।
भावी योजना: ठेक्का रद्द गरिएपछि राजविराज – रूपनी र राजविराज–छिन्नमस्ता सडक खण्डका लागि पुनः टेन्डर आह्वान भइसकेको र अबको एक महिनाभित्र सम्झौता गरिने सडक डिभिजन प्रमुख झाले जानकारी दिनुभयो।
यस्तै, राजविराज–हनुमाननगर सडक खण्डको लागि पनि दुई हप्ताभित्र टेन्डर आह्वान गरी निर्माण कार्य अगाडि बढाइने योजना रहेको छ।
प्रतिक्रिया