बीरगंज १४ कार्तिक । कृषि सामग्री कम्पनीले ग्लोबल टेन्डरमार्फत भित्र्याइरहेको युरिया मल नियमित रूपमा आउन थालेपछि वीरगन्ज र रक्सौलको रेल्वे स्टेसनमा मल बोकेको रेल्वे र्याकको चाङ नै लागेकाे समाचार छ ।
हाल वीरगंज स्थित सिर्सिया सुक्खा बन्दरगाह र सीमापारी भारतीय रेल्वे स्टेसन रक्सौलमा गरी ५ र्याक युरिया मल एकसाथ आई पुगेको छ ।
तीमध्ये सुक्खा बन्दरगाहमा २ र रक्सौल रेल्बे स्टेशनमा ३ र्याक रहेका छन् ।
यसै साता छठ पर्वका कारण २ दिन कार्यालय बिदा समेत रहेकाले रेल्वे स्टेसनहरूबाट कम्पनीको गोदाममा ढुवानी गरी मल ल्याउन नसकेको खबर छ ।
कम्पनी वीरगंज प्रादेशिक कार्यालयका प्रमुख दुर्गा प्रसाद पाण्डेले ५ र्याकमा गरी १२ हजार ५ सय टन मल रहेको र उक्त मल कम्पनीको गोदाममा व्यवस्थापन गर्न कठिनाइ हुने भएको छ । कम्पनीको वीरगन्जस्थित आफ्नै परिसर, भुटनदेवी र नेसनल ट्रेडिङको गोदाम समेत गरी सबै गोदाम मलले भरिएकाले नयाँ आउने मलको व्यवस्थापनमा समस्या भएको उनले बताए ।
हाल तीनवटै गोदाममा गरी २३ हजार ५ सय टन मल वीरगन्जमै मौज्दात रहेको उनले बताए । त्यसमध्ये ६ हजार टन युरिया र बाँकी डीएपी मल हो । प्रदेश कृषि मन्त्रालयले पुरानै कन्साइन्मेन्टबाट भित्रिएका मलको कोटा हालसम्म नलगाएकाले वीरगन्जबाट अन्यत्र मल परिचालन हुन नसकेको हो ।
हाल पाँचवटा र्याकमा आइपुगेको मल आदित्य बिरला र आईपीएल कम्पनीले ल्याएका हुन् । आईपीएल र आदित्य बिरलाले कम्पनी र नेसनल टेड्रिङको समेत गरी ५५ हजार टन युरिया मल एकसाथ नेपाल ल्याउँदै छन् । हाल आइसकेको मललाई गोदाममा व्यवस्थापन नगरिए निरन्तर थपिँदै जाने र मलको व्यवस्थापनमा झनै समस्या आउने सरोकारवालाले बताए ।
अहिले मलको माग नरहेको र आउँदो हिउँदमा गहुँ बालीका लागि यो मल उपयोगी हुने कम्पनी वीरगन्ज प्रादेशिक कार्यालयय प्रमुख पाण्डेले बताए ।
प्रतिक्रिया