बीरगंज २६ मंसिर । नापी कार्यालय पर्सामा कार्यरत सर्भेक्षक राम प्रमोद राउत र कार्यालय सहयोगी अरुण प्रसाद उपाध्यायलाई घुससहित नियन्त्रणमा लिएपछि विशेष अदालतमा मुद्दा दायर गरिएको समाचार छ।
अख्तियार दुरुपयोग अनुसन्धान आयोग, टंगालले प्राप्त सूचना तथा उजुरीका आधारमा छुट जग्गा दर्ता गरिदिने नाममा सेवाग्राहीसँग घुस मागिरहेको अवस्थामा आयोगको टोलीले उनीहरूलाई रकमसहित पक्राउ गरेको थियाे।
अनुसन्धानका अनुसार, आदर्शनगर, पानीट्याङ्की, वीरगंजमा कार्यरत दुबै जनाले छुट जग्गा दर्ता प्रक्रिया सहज बनाइदिने भन्दै सेवाग्राहीसँग रु. १ लाख रुपैयाँ घुस मागेको सूचना प्राप्त भएको थियो।
मङ्सीर २ गते उनीहरू उक्त रकमसहित अख्तियार दुरुपयोग अनुसन्धान आयोगकाे टाेलीले नियन्त्रणमा लिइएका थिए ।
अनुसन्धानका क्रममा सर्वेक्षक राउत र कार्यालय सहयोगी उपाध्यायको आपसी मिलेमतो तथा योजनामा पर्सा जिल्ला, वीरगंज २५ स्थित कित्ता नं. ५५, क्षेत्रफल ०.०६४ वर्ग मिटर जग्गा छुट दर्ता गरिदिने भनी सेवाग्राहीसँग घुस माग गरिएको पुष्टि भएको आयोगले जनाएको छ।
अख्तियारले उनीहरूलाई भ्रष्टाचार निवारण ऐन, २०५९ को दफा ३ ( १ ) बमोजिमको कसुरमा रु. १ लाख बिगो कायम गरी कैद र बिगो बराबर जरिवाना माग गर्दै आज विशेष अदालत, काठमाडौँमा आरोपपत्र दायर गरेको छ ।
आयोगले सरकारी सेवामा भ्रष्टाचारपूर्ण अभ्यासप्रति शून्य सहनशीलता अपनाउँदै यस्ता घटनामा कडा कानुनी कारबाही जारी रहने जनायाे।
प्रतिक्रिया