बीरगंज २३ मंसिर । राष्ट्रिय राजश्वमा सबैभन्दा बढी योगदान पुर्याउने वीरगंज भन्सार कार्यालयको राजश्व सङ्कलन मंगलबार शून्यमा झरेको समाचार छ ।
भन्सार एजेन्टहरूले मङ्गलबार बिहानै देखि ‘पेन डाउन’ ( कागजी काम बन्द ) गरी आन्दोलनमा उत्रिएपछि कार्यालयको राजश्व सङ्कलन ठप्प भएको छ ।
‘भन्सार ऐन, २०८२’ मा भएका केही प्रावधानहरूको विरोध गर्दै भन्सार एजेन्ट महासंघ नेपालले देशव्यापी आन्दोलन सुरु गरेपछि वीरगंज भन्सार कार्यालयको सम्पूर्ण गतिविधि अवरुद्ध भएको छ ।
वीरगंज भन्सार कार्यालयका सूचना अधिकारी उदय सिंह विष्टले भन्सार एजेन्टहरूको काम बन्दका कारण राजश्व सङ्कलन शून्यमा झरेको जानकारी गराएका छन् ।
यसअघि आइतबार देखि नै आन्दोलन सुरु भए पनि छलफल गरी कामकाजलाई निरन्तरता दिइएकोमा मङ्गलबार बिहानै देखि महासंघले देशव्यापी आन्दोलन घोषणा गरेपछि समस्या आएको उहाँले बताए ।
भन्सार एजेन्ट संघ, वीरगंजका अध्यक्ष राजमान तामाङले भन्सार ऐन, २०८२ को उपदफा ७१ को ( झ ) मा गरिएको व्यवस्था अव्यावहारिक रहेको भन्दै त्यसलाई हटाउन माग गरेका छन् ।
उहाँका अनुसार उक्त उपदफा ( झ ) मा स - साना मानवीय त्रुटिका कारण घोषणा रकमको १० प्रतिशत जरिवाना भन्सार एजेन्टले नै तिर्नुपर्ने प्रावधान रहेको छ ।
जसले एजेन्टहरूलाई ठूलो मार पारेको छ । उक्त व्यवस्था नहटाइए सम्म एजेन्टहरू काममा नफर्किने उहाँको भनाइ छ ।
देशको प्रमुख व्यापारिक नाका वीरगंजबाट भन्सार कार्यालयले मासिक साढे सत्र अर्ब रुपैयाँ र प्रतिदिन ५७ करोड रुपैयाँभन्दा बढी राजश्व सङ्कलन गर्ने गरेको छ ।
यस नाकाबाट नेपालकालागि ७५ प्रतिशतभन्दा बढी खाद्य पदार्थ, ७० प्रतिशतभन्दा बढी औद्योगिक कच्चा पदार्थ तथा पेट्रोलियम पदार्थ आयात हुने गरेकाे छ ।
वीरगंज भन्सार कार्यालयको आयात निर्यातमा आएको यो अवरोधलाई सरकारले छिटोभन्दा छिटो समाधान गर्न नसके देशभरका उपभोक्ताहरूले यसको नकारात्मक प्रभाव बेहोर्नुपर्ने अवस्था आउने संभावना छ ।
प्रतिक्रिया