.jpeg)
बीरगंज २३ मंसिर । पर्साको वीरगञ्जमा रहेको सिर्सिया सुक्खा बन्दरगाह भन्सार कार्यालयबाट लाखाै रूपैयाकाे सुकमेल चोरी भएको समाचार छ ।
काठमाण्डौमा रहेको पशुपति एक्जिम प्रालिले दक्षिण अमेरिकाको ग्वाटेमालाबाट खरिद गरी ल्याएको २० फुटे आठ वटा कन्टेनरमध्ये दुई वटा कन्टेनरको सिल फुटाएर लाखाै रूपैयाकाे सुकमेल चोरी भएका छन ।
गएको अक्टोबर १९ तारिखमा दुबई हुँदै विशाखापट्टनम बन्दरगाह भएर एक्सप्रेस–वे कन्टेन कम्पनीका आठ वटा कन्टेनरमा खरिद गरी ल्याएको दुई सय कार्टुन सुकमेलमध्ये कन्टेनर नम्बर ईएससीयू २००२२०६ र ईएससीयू २००२२४८ को सिल हटाएर ११ कार्टुन सुकमेल चोरी भएको आयातकर्ता कम्पनीका वीरगञ्जमा रहेका प्रतिनिधि मधु बरालले संचारकर्मीलाइ जनाए ।
उहाँका अनुसार चोरी भएको ११ कार्टुनमा प्रति कार्टुन ४० किलोका दरले चार सय ४० किलो सुकमेल रहेको थियो । चोरी भएको सुकमेलको मूल्य अन्दाजी १३ लाख ४२ हजार रुपैयाँ रहेको उहाँले बताए ।
त्यसैगरी अर्काे कन्टेनरबाट पनि चाेरी भएकाे कुरा बरालले जनाए ।
सुक्खा बन्दरगाह भन्सार सञ्चालन गर्ने प्रिस्टिन भ्याली ड्राइपोर्ट प्रालिका कामदारकै मिलोमतोमा सुकमेल चोरी भएकाले छानबिन गरी क्षतिपूर्ति उपलब्ध गराउन माग गरिएको प्रतिनिधि बरालले जनाए ।
सुकमेल जाँचपास गर्न २० प्रतिशत भन्सार महसुल, १० प्रतिशत अन्तःशुल्क र १३ प्रतिशत मूल्य अभिवृद्धि कर गरी ४३ प्रतिशत अर्थात् ८० लाख रुपैयाँ राजस्व तिर्नुपर्नेमा आयातकर्तासँग रकम अभाव भएपछि विगत दुई महिनादेखि जाँचपासका लागि त्यो कन्टेनर सिर्सिया सुक्खा बन्दरगाह भन्सार कार्यालयमा अड्किएका थिए ।
उक्त सम्बन्धमा सिर्सिया सुक्खा बन्दरगाह भन्सार कार्यालय बीरगंजका भंसार प्रमुख अधिकृत डा. राम प्रसाद मैनालीले साे घटनाकाे छानबिन समिति भन्सार अधिकृत प्रमाेद दासकाे नेतृत्वमा गठन गरी सकिएकाे र छिटै घटनाकाे छानबिन हुने र दाेषीहरूमाथि कानुनी कारवाही गर्ने बताउनु भयाे ।
प्रिस्टिन भ्याली ड्राइपोर्ट प्रा.लि.बीरगंजका प्रमुख अतुल सर्मासँग फाेन सम्पर्क गर्न खाेज्दा उहाँहरू उक्त कन्टेनरकाे सिल फुटाएर चाेरी गर्ने गिराेह पता लगाउनमा ब्यस्तता रहेका कारण फाेन सम्पर्क हुन नसकेकाे यस दैनिकका संवदाताले जनाए ।
