बीरगंज १५ माघ । पर्साकाे सवैया साझेदारी वन उपभोक्ता समूहमा लखन साह कानुको नेतृत्वमा नयाँ कार्यसमिति चयन भएको समाचार छ ।
सो साझेदारी वनले ३ वर्षपछि बिहिबार नयाँ कार्यसमिति चयन भएकाे हो ।
सवैया साझेदारी वन उपभोक्ता समूहकाे साधारण सभाले उपाध्यक्षमा अस्लम आलम र ३२ वडाबाट वडास्तर प्रतिनिधिका रूपमा शेख नेसार अन्सारीलाई निर्विरोध चयन गरेको छ । नयाँ कार्यसमितिमा एक अध्यक्षसहित ७ जना खुला सदस्य, एक–एक जना आदिवासी जनजाति र दलित समुदायबाट सदस्य चयन हुने व्यवस्था रहेकाे छ ।
साथै ३ जना महिला सदस्य, वीरगंज महानगरपालिका र पर्सागढी नगरपालिकाको कार्यपालिकाबाट १ / १ जना सदस्य तथा डिभिजन वन अधिकृतले खटाएका एक जना सहायक वन अधिकृत गरी कुल १७ जनाको कार्यसमिति रहनेछ ।
अध्यक्ष लखन साह कानुले सबै कार्यसमिति सदस्य सर्वसम्मत रूपमा चयन भएको जानकारी दिँदै आइतबार सबैको नाम सार्वजनिक गरिने जनाए ।
२०६२ सालमा स्थापना भएको सवैया साझेदारी वन उपभोक्ता समूह नेपालको पहिलो तथा सबैभन्दा पुरानो साझेदारी वन समूह हो ।
२०७९ भदौ १६ गतेदेखि नयाँ कार्यसमिति गठनका लागि प्रक्रिया सुरु भए पनि प्रतिनिधि छनोट सम्बन्धी विवाद अदालतसम्म पुगेपछि साधारण सभा गर्न ३ वर्ष ५ महिना कुर्नु परेको जनाए ।
कार्यसमिति चयन ढिलाइ हुँदा उपभोक्ताले ३ वर्षदेखि काठ – दाउरा प्राप्त गर्न सकेका थिएनन् । सो साझेदारी वनमा ३ वर्षअघि कटान गरिएको २० हजार क्युफिट काठ घाटगद्दीमै कुहिन थालेको छ ।
अध्यक्ष कानुले वनबाट उत्पादन भएको काठ – दाउरा ढिलाइ नगरी उपभोक्ताको आवश्यकताका आधारमा वितरण गरिने जनाए ।
‘आन्तरिक विवादका कारण साधारण सभा हुन नसक्दा अढाई वर्षदेखि काठ वितरण रोकिएको थियो । आज नयाँ कार्यसमिति चयन भएकाेमा म अत्यन्त खुसी छु,’ अध्यक्ष कानुले भन्न्ु भयाे, ‘आजदेखि वन संरक्षणसँगै ३२ वटै वडाका जनताको समस्या समाधान हुने विश्वास लिएको जनाए ।’
सवैया साझेदारी वन पर्सा जिल्लाको उत्तरी भेगमा ३ हजार १८८ हेक्टर क्षेत्रफलमा रहेको छ । वीरगंज महानगरपालिकाका ३० वटा वडा र पर्सागढी नगरपालिकाका वडा नम्बर ३ र ४ गरी ३२ वटा वडा यस वन समूहअन्तर्गत छन ।
२०७२ सालको जनगणनाअनुसार ३९ हजार ७७४ घरधुरीका २ लाख ४१ हजार ८०८ उपभोक्ता यस साझेदारी वनमा आबद्ध छन् ।
अध्यक्ष कानुले नयाँ कार्यसमितिले दक्षिणी भेगका खाली भूभागमा वृक्षरोपण गरी वन क्षेत्र विस्तार गर्दै लैजाने योजना रहेको जानकारी गराए ।
प्रतिक्रिया