बीरगंज २५ श्रावण । हिन्दु धर्म-संस्कृतिमा विशेष धार्मिक, प्राकृतिक एवं सांस्कृतिक महत्त्व बोकेको साउन महिनाको अन्तिम सोमबार आज काठमाडौँको पशुपतिनाथसहित देशभरका प्रमुख शिवालयहरूमा श्रद्धालु भक्तजनको उल्लेख्य घुइँचो लागेको छ।
साउन महिना भगवान् शिवको प्रिय महिना मानिने भएकाले यस अवधिमा व्रत बस्ने, पूजाआजा गर्ने र पवित्र नदी तथा तालबाट जल ल्याएर शिवालयमा अर्पण गर्ने परम्परा छ।
विशेष गरी साउनको अन्तिम सोमबार काठमाडौँको सुन्दरीजलबाट जल ल्याई पशुपतिनाथमा चढाएर पूजापाठ गर्न बोलबम श्रद्धालुहरूको ठूलो उपस्थिति रहेको छ।
धार्मिक मान्यता र महत्त्व
संस्कृतिविद् गोविन्द टण्डनका अनुसार माता पार्वतीले साउन महिनामा निराहार रही कठोर व्रत बसेर भगवान् शिवलाई पति रूपमा प्राप्त गर्नुभएको धार्मिक कथन छ। सोही मान्यताका आधारमा विशेष गरी हिन्दु महिलाहरूले साउनका सोमबारहरूमा व्रत बसी शिवको आराधना गर्ने गर्छन्।
साउने सोमबारको व्रत, दान र पूजापाठबाट आफू, श्रीमान्, सन्तान तथा सम्पूर्ण परिवारको कल्याण हुने र अन्य दिनको तुलनामा धेरै गुणा बढी फल प्राप्त हुने धार्मिक विश्वास छ। हिन्दु पुराणहरूमा मुख्य रूपमा साउने सोमबार, १६ सोमबार र सोम प्रदोष गरी तीन थरी सोमबार व्रतको चर्चा गरिएको छ।
देशभरका प्रमुख मन्दिरहरूमा बोलबम मेला
अन्तिम सोमबारका अवसरमा पशुपतिनाथबाहेक अन्य प्रसिद्ध धार्मिक स्थलहरूमा पनि बिहानैदेखि भक्तजनको बाक्लो उपस्थिति छ:
उपत्यकाभित्र: काठमाडौँको पशुपतिनाथ, भक्तपुरको डोलेश्वर र ललितपुरको कुम्भेश्वर।
उपत्यकाबाहिर: पूर्वको हलेसी (खोटाङ), सुनसरीको पिण्डेश्वर, म्याग्दीको गलेश्वर, कपिलवस्तुको कुशेश्वर, पर्वतको गुप्तेश्वर, जनकपुरको कपिलेश्वर र जलेश्वरको शिरेश्वर।
त्रिवेणी धाम: चितवन, नवलपरासी र तनहुँको सङ्गमस्थल देवघाटधाममा पूजाआजा गर्ने तथा बोलबम मेला भर्ने श्रद्धालुहरूको ठूलो घुइँचो लागेको छ।
त्यसैगरी पर्सा जिल्लाकाे भाठा, अलखिया मठ, पशुपतिनाथ मन्दिर लगायत बारा जिल्लाकाे काठघाटमा पूजाआजा गर्ने तथा बोलबम मेला भर्ने श्रद्धालुहरूको ठूलो घुइँचो लागेको छ।
प्रतिक्रिया